Prezidente Komisaun Funsaun Públika (KFP), Faustino Cardoso hateten, molok Konsellu Ministru diskute polítika reforma administrativa, Xefe Governu hakarak hatene uluk objetivu husi reforma administrativa ne'e.
"Ohin ami mai hato'o pareser sira nesesáriu ba Primeiru Ministru, para bele informadu kona-ba vantajem no dezvantajem sira ne'ebé atu hato'o ba malu, molok tama ba diskusaun iha Konsellu Ministru," dehan nia, iha Palásiu Governu, Tersa (8/9).
Nia afirma, polítika reforma ne'e la'ós ba administrativa de'it, maibé ba mós funsaun públika.
"Ohin ami mai haree pareser sira ne'ebé ligadu ho Funsaun Públika, tanba atu hasa'e servisu Funsaun Públika nian ho eficiencia no efikásia," dehan Faustino.
Entretantu, polítika reforma administrativa ne'e relevante duni ka la'e, maibé KFP só ezekuta de'it polítika governu nian.
"KFP la'ós orgaun ne'ebé polítika, maibé atu implementa polítika governu nian, agora kestaun relevansa ka lae ne'e kabe ba kompeténsia membru governu sira-nian, maibé KFP nia dever mak hato'o pareser, para sira esklaresidu bainhira hola desizaun, sira hatene nanis ona vantajem no dezvantajem sira," katak nia.
Faustino mós dehan, pontu importante husi pareser polítika reforma administrativa ne'e mak oinsá servisu bele defisiénsia no efikásia, profesionál, prestasaun servisu ho kualidade no fó satisfasaun ba públiku. (*)
