Tuir Xanana Gusmão, Timor ho ninia kultura ne'ebé ulun fatuk toos, tanba ne'e liu-husi Estadu Emerjénsia atu halo prevensaun ba da'et Covid-19 iha rai-laran.
"Timor ne'e nia kultura ulun fatuk toos, ita-nia oan sira mai ita hakilar ulun toos hanesan fatuk, depois Estadu Emerjénsia hotu tiha, iha dia 4 (Setembru 2020), la hatene sira (Governu) prolonga ona ka lae", dehan Xanana, iha Aldeia Rembor, Postu Administrativu Manatutu-Vila, Munisípiu Manatutu, Tersa (8/9).
Lider nasionál ne'e esplika, Estadu Emerjénsia agora atu kontrola de'it ema hirak ne'ebé tama sai iha fronteira sira no parte ida halo preparasaun para bainhira moras Covid-19 da'et iha rai-laran karik tenke preparadu.
"Covid la'ós ita nian de’it, maibé tanba iha mundu seidauk bele kontrola no seidauk bele hapara, tanba ne'e tenke preparadu para loron ruma mosu mai iha ita-nia rain, entaun ita tenke tuir regra sira ne'ebé saúde dehan koordena ho autoridade no seguransa polisia sira", tenik Xanana
Lider karizmátiku ne’e dehan, problema boot mak seidauk iha ai-moruk, ida fali mak moras ne'e da'et tutan iha mundu daudauk la konsege kontrola. Kuandu mosu karik iha Timor mak Estadu dehan hotu-hotu tuir regra ne'ebé saúde hanorin ona, hotu-hotu tenke tuir, tanba moras ne'e da'et perigozu no lalais loos no la konsege kontrola.
Regra atu prevene Covid-19 mak hanesan fase liman beibeik ho sabaun, sai ba fatin públiku uza máskara, no distansiamentu sosiál. (*)