Vice-ministru Solidariedade Sosiál no Inkluzaun (Vice-MSSI), Signi Chandrawati Verdial informa, lista reklamasaun hirak ne'e besik rihun 16 no rihun 10 prontu ona atu halo pagamentu.

"Prontu pagamentu, maibé sei tun fali kordena ho Ministériu Administrasaun Estatal (MAE), xefe suku no xefe aldeia sira atu haree dadus ne'e loloos mak foin halo pagamentu ba segundu faze", Vice-MSSI informa hafoin reuniaun Konsellu fundu Covid-19 iha edifísiu Ministériu Finansas Aitarak-Laran, kinta (10/09).

Tuir Nia, sidauk iha data fiksu atu halo pagamentu refere, maibé tenta fin Fulan setembru bele realiza.

"Montante orsamentu, ita nia estimasaun purvolta $3.2 milloes no lista reklamasaun kuaze 16 Mill, maibé iha faze verifikasaun mak foin bele determina loloos se mak bele simu no se mak labele simu, entaun parese sei tun husi 16 Mill", tenik Nia

Tuir nia, dadaun ne'e parte tekniku sira sei haree dadus ho loloos, tan ne'e husu ba komunidade pasensia ituan.

"Sira sei la lakon sira nia direitu, presiza pasensia, verifika dadus halo loos, depois bele hetan sira nia direitu tuir Lei ne'ebé haruka", Nia hakotu (*)