Antes ne'e, FALINTIL-FDTL hamutuk ho PNTL husi UPF no KOE kaptura membru arte-marsiál PSHT hamutuk na’in 37, inklui na’in 14 iha Kolmera tanba ultrapasa ilegalmente mai Timor-Leste hafoin ba ezame sintu iha Indonézia.

Ho kazu hirak ne’e fó boot ba Timor-Leste hetan moras Covid-19 tanba númeru moras ne’e iha Indonézia kontinua sa’e makaas.

Diretór Fundasaun Mahein, João Almeida hateten, atividade ilegalmente iha fronteira akontese, ne'e kontribui mós Timor-Leste atu iha kazu Covid-19.

"Atividade ilegál ne'e fó risku mai Timor-Leste atu iha tan kazu Covid-19," dehan nia, ba www.tempotimor.com, iha nia knaar fatin, Fomentu, Kuartu (9/9).

João akresenta, liña fronteira ne'ebé naruk inklui membru UPF ne'ebé la sufisiente no fasilidade ne'ebé natoon sai difikuldade ba parte seguransa.

"Ita-nia Fronteira husi Suai to'o Oekusi naruk, maibé membru UPF la to'o atu patrulla, mezmu la'o-ain hanesan atividade rotina maibé balun laiha botas," dehan nia.

Observasaun Fundasaun Mahein iha fronteira, sidadaun sira tama-sai ilegalmente, iha mós atividade tranzasaun fa’an no sosa sasán ilegál, ne'ebé iha risku makaas ba Timor-Leste. (*)