"Tama ilegál ne'e, preokupasaun boot, ami rona katak foin dadauk ne'e juventude balun ba rai ketan, depois tama fila fali mai, depois ba liu uma, maibé la liu husi kuarentena, ne'ebé favór boot ida, kuandu tama mai karik liuhusi kuarentena, para evita transmisaun Covid-19 ne'e, iha komunidade," dehan MNEK Adalgiza, iha Ministériu Finansas, Aitarak Laran Dili, Kinta (10/9).
Governante ne'e, mós ko'alia ho Ministra Saúde (MS), Odete Belo, hodi tau atensaun ba juventude sira ne'ebé kontra regras saúde nian.
"Ohin ha'u mós ko'alia ona ho Ministra Saúde, entaun nia mós preokupa loos, tanba iha juventude barak mak tama ilegál no sira ba liu de'it sira-nia uma. Depois PNTL no parte saúde ba husu kooperasaun, hodi lori sira ba kuarentena," katak nia
Ministra ne'e mos apela ba juventude sira, atu labele halo movimentu ilegál no husu atu kupri regras ne'ebé mak iha.
"Ha'u apela ba alin sira katak, ita ne'e sorte loos, maske ita iha Covid-19, maibé laiha transmisaun komunidade, tanba bainhira iha transmisaun lokál, ne'e ita araska loos, tanba ne'e husu ba alin sira lalika tama ilegál, maibé favór tama ho regra ka liu husi imigrasaun," dehan Adalgiza
Adalgiza afirma katak, Governu tenke halo vijilánsia liután no husu ba komunidade sira, atu respeita regras sira husi EE nian.