Situasaun ne'e hamosu mós preokupasaun ba povu Timor-Leste inklui mos ba ema estranjeiru iha nasaun seluk.
Nune'e, liuhusi realizasun sesaun lejizlasaun dalatoluk iha Parlamentu Nasionál, Tersa (15/9), deputadu bankada PUDD, António de Sá Benevides, levanta kestaun ne'e no husu ba Estadu atu haree oinsá buka solusaun.
Nia preokupa, tanba agora ukun aan ona, maibé haree independénsia ne'e sai fali independénsia ne'ebe fahe malu podér hodi impata prosesu ba dezenvolvimentu iha rai-laran.
"Hahú husi 2017 to'o 2020 mosu pergunta boot husi povu mai ita, Timor-Leste atu ba iha ne'ebe," dehan António.
Nia hatutan, bazeia ba observasaun, ema dehan, dezenvolvimentu Timor oras ne'e marka pasu iha fatin tanba ida-idak, polítiku sira preokupa dada ahi anar ba ikan sardina.
Ne'e duni, husu Estadu bele tau atensaun oinsá lider sira buka malu tuur hamutuk fila-fali hodi dezenvolve nasaun ne'e, hodi hatudu katak rezultadu dezenvolvimentu mak ne'e.
"Pergunta simples ida maka uluk iha funu lider sira unidu, agora ukun-aan tiha lider sira fahe malu, ne'e Tanbasá? Resposta simples ne'e tanba ami buka poder, hodi ami hatudu ami ninia inkonstisensia ba povu tomak iha desizun polítika," tenik nia. (*)