Bankada CNRT deklara kestaun ne’e iha sira-nia intervensaun iha abertura ba sesaun datoluk lejislativa dahaat ne’ebé PR Lú Olo mós hola parte.
Vise Xefi bankada CNRT, Patriocino dos Reis Fernandes liu husi deklarasaun bankada CNRT deklara, PR Lú Olo kontinua halo violasaun ba K-RDTL.
Tuir nia, PR Lú Olo kontinua asume kargu nu'udar Prezidente Partidu Fretilin hili halo violasaun ba K-RDTL tanba hakarak asegura inkluzaun partidu Fretilin nian iha governasaun.
"Iha loron 19 Maiu 2020 povu tomak Timor-Leste nian, reprezentante komunidade Internasional iha rai laran no mundu tomak akonpanã, oinsa violasaun konstitusional ne'ebé mosu iha Prezidensia Repúblika da’et to’o iha parlamentu nasional," dehan Patriocino, Tersa (15/09).
Tuir bankada CNRT, nia hatutan, iha altura ne’ebá loloos PR Lú Olo foti desizaun hodi dezolve PN bazeia ba K-RDTL artigu 86 alinea ‘f’ ne’ebé hatete katak “iha loron 60 bainhira laiha formasaun governu ka laiha aprovasaun orsamentu jeral estadu Prezidente Repúblika bele dezolve parlamentu nasional”.
Maibé tanba PR Lú Olo la foti desizaun, nia dehan, iha 19 Maiu 2020 mosu trajedia kontra demokrasia iha Timor-Leste, tanba prazu konstitusional loron 60 termina iha 17 Marsu 2020, maibé iha loron 120, bankada Fretilin, PLP no KHUNTO halo golpe estadu hodi hada’u meza PN.
Asaun husi bankada 3 ne’e, tuir nia, kontra K-RDTL artigu 99 númeru 3, Lei Organizasaun Funsionamentu parlamentu Parlamentar no rezimentu Parlamentu Nasional.
"Ironia boot liu mak iha loron 20 Maiu 2020, Prezidente Repúblika dekreta katak kontinua fó apoiu ba oitavo governu tanba bankada tolu konsege hada’u ona meza Prezidente Parlamentu Nasional," dehan Patriocino.
Hafoin remata lee deklarasaun bankada, deputadu sira husi opozisaun walk out molok Prezidente Repúblika Francisco Guterres Lú Olo hato'o ninia mensajen.