Deputada Helena Martins hateten, polítka ne’ebé governu nian kria kampu servisu ne'e haree realidade besik tinan ida ona maibé seida’uk akontese.
“Públiku mós hatene katak servisu hira ona mak sira asegura ba joven sira", dehan nia, iha Uma Fukun PN, horisehik.
Deputada ne'e hatutan, kada loron joven hira mak nadodon ba fatin formasaun no joven mak nadodon ba fatin sira ne’ebé akomoda timoroan ba estranjeiru.
Entretantu, Deputadu Bankada CNRT, Partocino dos Reis dehan, polítika governu nian atu kria kampu servisu ne’e projesaun Governu nian ba mandate tinan lima nian.
Governu tenta atu deskobre dezafiu ne’ebé nasaun nian kona-ba dezempregu para bele buka solusaun.
“Númeru ida 60.000 kada tinan ne’e hanesan previzaun ida atu hatudu vontade polítika governu nian. Maibé polítika ne’e atu la’o 100% ne’e depende ba sirkunstásia ba polítika no realidade iha ita-nia rai laran”, tenik nia.
Nia hatutan, polítika ne’e kuandu la realiza iha mandate ida ne’e, signifika fó hanoin ba governasaun ne’ebé tuir mai atu tau atensaun.
Membru parlamentu balun ne’ebé haree ba realidade ne’e la’os krítika de’it iha meza parlamentu, maibé krítika mós iha média sosiál kona-ba polítika Governu nian ne’eb’e atu kria kampu servisu ba timoroan 60.000 kada tinan.