Xanana : Horta Mak ’Komandante En Xefe’ iha Estranjéiru

Eis Líder Máximo CNRM, Kay Rala Xanana Gusmao komprimenta eis Reprezentante especial CNRM, Dr. José Ramos Horta, wainhira hasoru malu iha Katrai karaik, Letefoho, Ermera (18/9) Eis Líder Máximo CNRM, Kay Rala Xanana Gusmao komprimenta eis Reprezentante especial CNRM, Dr. José Ramos Horta, wainhira hasoru malu iha Katrai karaik, Letefoho, Ermera (18/9) Foto Tempo Timor

Tempotimor (Dili)-Hafoin eis Prezidente Repúblika Dr. Jose Ramos Horta hahi eis komandante en xefe das FALINTIL, Kay Rala Xanana Gusmão nu'udar mesias no besi-asu Timor-Leste, iha okaziaun hanesan Xanana GGusmao fila rekoñese eis Prezidente Repúblika, Dr Jose Ramos Horta nu'udar komandante en xefe ba Luta Libertasaun Nasional iha diáspora.

Tuir Xanana, Horta nu'udar komandante en xefe, “tan ba nia mak ha'u-nia liman loos.”

"Iha 86 ha'u sai husi Fretilin, tanba bolu ha'u traidór, entaun nia (Horta) mak hekerek surat ba ha'u no nomeia nia hanesan reprezentante espesiál komandante Falintil nian, hodi nia bele ko'alia, istória sira ne'ebé akontese ona ne'e akontese," dehan Xanana liuhusi nia diskursu bainhira halo asaun karitativa ba komunidade kbiit laek sira iha suku Katrai Lauana, Sesta (18/9).

Nu’udar komandante en Xefe das FALINTIL iha ailaran, momentu ne’eba Xanana Gusmao lakon konfiansa ona  ba nia kompatriota sira iha rai liur ne'ebé, “bolu ha'u (Xanana) traidor.”

"Maun Ramos Horta ne'e mak ita temi karaik, ha'u atu temi karik ha'u-ha'u-nia liman loos iha liur ne'ebá, mais nia mak sai portavoz, nia mak sai reprezentante espesiál komandante ein xefe Falintil hodi ko'alia iha ne'ebá," nia dehan.

Eis Líder Máximo Konsellu Nasional Rezistensia Maubere (CNRM sigla Portuges) ne'e afirma, bainhira laiha reprezentante espesiál iha rai liur, maka TL nia luta sei hasoru dezafiu barak.

"Se laiha ne'e susar, tansa susar? Tanba susar teb-tebes komunika ba malu. Ne'ebé ami rua mosu iha ne'e, nia reprezenta servisu husi liur, ha'u iha ne'e, ita katuas sira hamutuk, kompleta malu mak ida ne'e," katak Xanana.(*)

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.