Kandidatu traballadór sira ne'ebé hahú tuir teste ne'e, maiória husi munisípiu Díli nian, hamutuk ema nain 13.174, kompostu husi feto 5,068 no mane 8,106.
Iha diskursu abertura, Sekretáriu Estadu Formasaun Profisionál no Empregu (SEFOPE), Alarico de Rosário hatete, prosesu selesaun hodi halo rekrutamentu ba kandidatu traballadór Timor-oan sira ne'e, atu ba servisu iha Austrália, sei la haree ba ema ida no sé de'it, maibé prosesu hotu sei la'o ho transparante.
“Iha ne'e, ema bolu dehan la pilih kasih, la hili sé deit, ha'u sei ko'alia kedas iha ne'e, laiha kolega no amigu di'ak iha laran, hotu-hotu imi nia kolega, imi nia alin no maun-alin, sira ne'e imi nia família hotu”, hatete Sekretáriu Estadu Formasaun Profesionál no Empregu (SEFOPE), Alarico de Rosário, iha abertura teste fizíka, ba kandidatu traballadór Timor-oan sira, ba Austrália, iha akadémia PNTL Comoro, Segunda (21/09).
Nia dehan, durante ne'e públiku kestiona kona-bá prosesu rekrutamentu iha SEFOPE, maiória mak haree liu ba família ho kór polítiku no seluk tan, tanba ne'e mak, iha teste ikus ba kandidatu traballadór sira husi munisípiu Díli nian, sira deside realiza iha Akadémia PNTL Comoro, hodi involve direta mós husi membru polísia sira, atu ema labele kestiona.
“Tanba ida ne'e mak ami hakarak halo transparánsia rekrutamentu ida ne'e, para públiku bele hatene katak, iha duni rekrutamentu murni”, dehan nia.
Alarico dehan, SEFOPE sei fó oportunidade barak ba joven sira, atu bele ba servisu iha Austrália, maibé importante mak tenke kuidadu-aan no saúde, kandidatu sira ne'ebé liu, sei ba Austrália, no sira ne'ebé la liu, tenke kontente nafatin, hodi hein oportunidade seluk.
“Ida ne'ebé la liu, labele fuan taridu, maibé kuidadu mak Ita-boot sira nia-aan, ba iha uma karik, labele mete tun-sa'e no tenke fiar katak loron ida ha'u sei ba Austrália”, nia fó hanoin.
Entretantu iha prosesu teste fíziku ba munisípiu Díli nian, sei hala'o durante loron 15 nia laran, husi loron 21 Setembru to'o loron 07 fulan Outubru, no kada loron, sei fó teste, ba ema nain 900 to'o remata.
Nia espera, iha tinan ne'e, pandemia Covid-19 bele lakon, atu ema bele loke ona odamatan Aeroportu nian, hodi nune'e, sira ne'ebé liu iha tinan kotuk 2019, ho tinan ida ne'e (2020), bainhira Governu Austrália husu, SEFOPE sei haruka ba Austrália.(*)
