Dokumentu OJE 2020 La Kompletu, Deputadu PN Konsidera MF Laiha Kapasidade

Deputada Fernanda Lay halo intervensaun iha plenaria PN (21/9) Deputada Fernanda Lay halo intervensaun iha plenaria PN (21/9) Foto Arkivu

Tempotimor (Dili) - Parlamentu Nasionál presiza dokumentu kona-ba Orsamentu Jerál Estadu (OJE) tinan fiskál 2020 atu hahú debate orsamentu, maibé dokumentu ne’ebé Ministériu Finansas aprezenta ba Parlamentu Nasionál la kompletu.

Haree husi servisu hirak ne’e deputadu Parlamentu Nasionál konsidera Ministériu Finansas laiha kapasidade servisu hodi prepara matéria ne'ebé presiza iha diskusaun OJE.

Deputada Bankada CNRT, Maria Fernanda Lay, duun Ministériu Finansas (MF) laiha kapasidade, tanba laiha preparasaun ba dokumentu ezekusaun orsamentál iha tinan 2020 nian.

Nia deklara, daudauk Parlamentu Nasionál iha hela époka debate OJE 2020, entaun relatóriu hirak ne'e Parlamentu Nasionál presiza.

Nia esplika, dokumentu hirak ne'e kona-ba ezekusaun orsamentu ba RAEOA tokon US$ 5.7 ba sosa ekipamentu saúde, nune'e mós totál orsamentu ne'ebé governu levanta husi fundu petrolíferu.

Tanba ne'e, husu ba Ministériu Finansas atu prepara relatóriu hirak ne'e hodi aprezenta ba Komisaun C PN, nune'e deputadu sira bele analiza iha prosesu debate OJE 2020 nian.

"Agora dokumentu ezekusaun orsamentál RAEOA laiha, kona-ba verba ida kona-ba governu fó ba akumula tokon US$ 5.7 ba sosa ekipamentu ne'e ami laiha, no mós osan hira mak governu hato'o liu husi fundu petrolíferu depois autorizasaun ne'e ami laiha," dehan Deputada Fernanda, iha plenáriu estraordináriu PN, horisehik.

Hataan ba kestaun ne'e, Ministru Finansas (MF), Fernando Hanjam, promete sei kompleta dokumentu hirak ne'e iha loron 23 fulan ne'e, hodi aprezenta ba Komisaun C PN.(*)

Rate this item
(1 Vote)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.