Husi total ministeriu 12 ho kompozisaun ministru 11, vise-ministru 7 no sekretariu estadu 10, Governu foin produs de'it lei organika hitu.
Deputada bankada FRETILIN, Lidia Norberta no Deputadu Bankada Partidu Libertasaun Popular (PLP), Sabino Soares 'Guntur', kestiona lei orgánika estrutura governu nian, tanba governasaun eziste besik tinan ona, maibe foin maka produs hitu.
Deputada Lidia reforsa, Governu mak laiha esforsu para halo lei orgánika ba ministériu sira ne’e, tanba informasaun iha katak ministériu barak mak submete ona lei orgánika ba governu.
Entretantu, Deputadu Sabino Guntur dehan, lei orgánika ne’e mak orienta ministru sira ba halo servisu, maibé to’o agora lei orgánika ne’e ministériu barak mak laiha.
Hataan ba kestaun ne’e, Ministru Reforma Lejizlativa Asuntu Parlamentár, Fidelis Leite Magalhães, dehan lei orgánika ne’e tuir faze.
Nune'e presiza haree didiak antes hatuka ba Prezidente Repúblika, tanba 'tauk' nia haruka fo fila-fali Governu kuandu iha buat ruma la loos.
“Ita-nia Prezidente Repúblika ne’e jurista ida, tanba ne’e ita halo sasan la ho kualidade husi ministerial ba prezidente i to’o iha ne’ebá prezidente haruka fila fali", tenik Fidelis, iha Uma Fukun PN, Tersa (9/10).
Ministru ne’e salienta, di’ak liu han tempu oituan, tanba bainhira lei orgánika ne’e haruka ba tenke kualidade tanba parte ida respeita instituisional mós ba instituisaun sira seluk.
Ministru ne’e mós rejeita argumentu katak servisu iha ministériu botuk tanba lei organika laiha, tanba servisu sei la’o nafatin la’os dehan lei orgánika iha mak foun sasan sira ne’e la’o ne’e la loos.