Maibé, Orsamentu Jerál Estadu (OJE) ba tinan 2021 ne'ebé governu atribui ona ba Ministériu Obras Públika ho valór orsamentu tokon US$ 176, ne'ebé la inklui orsamentu ba kapitál dezenvolvimentu nian.
Tanba ne'e, MOP husu atu orsamenta tan valór orsamentu 20% husi valór orsamentu ne'ebé iha hodi haforsa kapitál dezenvolvimentu.
"Kapitál dezenvolvimentu iha projetu lubuk ida, iha fundu infraestrutura mós hanesan. Horisehik ami aprezenta valór projetu, maibé ami husu para orsamenta de'it 10% ka 20% husi totál valór ne'ebé iha, tanba ita presiza halo investimentu tempu sertu mak 2021", hatete Ministru Obras Públika (MOP), iha Ministériu Finansas (MF), Ai-tarak Laran, Tersa (22/09).
Salvadór dehan, husi OJE 2021 ne'e rasik, primeiru MOP sei halo investimentu tuir nia programa kada tinan ne'ebé halo hanesan eletrisidade, tanba hakarak halo fazeadamente konklui koneksaun liña distribuisaun ba suku hamutuk 76 ne’ebé seidauk hetan asesu.
"Tinan oin ita tau uluk 33 ami hanoin atu aumenta tan, maibé ne'e depende ba prontidaun husi ita nia tékniku sira ne'ebé la'o hela iha territóriu sira para dezenvolve liután", dehan nia.
Kona-ba bee-moos, nia dehan, sira hanoin ona atu liberta komunidade sira iha postu administrativu hamutuk 41 ba sistema bee urbanu ne'ebé aban-bainrua empreza públika sira mak sei ezekuta.
Alende ne'e, sei halo mós manutensaun ba estrada rurál sira ne'ebé estabelesidu ona no mós halo reabilitasaun foun ba estrada sira iha tinan 2021 ninian ne'ebé kuaze pakote 45.
"Estrada munisipál iha 12 pakote no mós ponte 10 hanesan ne'e, ne'ebé detalla lista ha'u labele fiksa iha ne'e, maibé ida ne'e mak ita hanoin. Maibé horisehik ne'e sira aprova hotu lista sira ne'e", dehan nia.
Maski nune'e, nia dehan, daudaun ne'e ekipa tékniku sira sei halo hela ajustamentu hodi ba aprezenta fali projetu foun sira ne'ebé atu finansia iha fundus infra estrutura nia sesaun molok aprezenta ba KROP polítika ida prinsipál ne'ebé Primeiru Ministru Taur Matan Ruak rasik mak lidera. (*)