Tuir Diretór Jerál SEFOPE, Paulo Alves, kona-ba akontesimentu entre kandidata traballadora ho ezaminadór sira katak, prosesu atu ba servisu iha Austrália tuir rekizitu ne'ebé governu Austrália fó liuhusi emprezáriu ne'ebé rekruta timoroan sira ba servisu iha Austrália.

Nia hatutan, iha manuál laran katak kandidatu hotu la’ós Timor-Leste mesak, maibé nasaun sanulu inklui illa pasifika, ne'ebé atu ba servisu iha Austrália mínimu sira tenke prenxe rekizitu.

rekizitu prinsipál maka tenke teste fíziku, hanesan push up, chicken rich no halai no buat sira ne'ebé hakerek hotu ona iha prosedur laran, entaun SEFOPE ezekuta tuir manuál ne'ebé iha.

Prosesu selesaun ba etapa primeiru maka push up feto tenke prenxe 15 no mane tenke 30.

"Se sira la to'o prosesu ne'e ita elimina kedas, entaun sira labele avansa ba prosesu tuir mai, maibé oportunidade ba sira sei iha no sei tuir fila-fali ba iha etapa daruak nia", dehan Paulo, Sentru Formasaun PNTL, Komoro, Tersa (22/9).

Nia mós husu ba joven sira ne'ebé la liu selesaun iha etapa dahuluk ne'e katak lalika laran taridu, tanba sira sei fó tan oportunidade ba faze tuir mai.

Tanba dadus ne'ebé joven sira rejistu, sei la lakon maibé sai hanesan baze dadus SEFOPE nia ba kandidatu sira ne'ebé buka servisu.

Nia klarifika katak, se servisu ne’e SEFOPE ninia entaun sira bele muda kritériu ne’e, maibé kritériu ne'e mai husi manuál prosedimentu operasionál Austrália ninia entaun SEFOPE só bele implementa de’it.

Iha fatin hanesan, Komandante Sentru Formasaun Polisia, Superintendente Arquimino Ramos hatete, insidente ne'ebé mosu entre kandidatu ho ezaminadór sira ne'e, balun fahe informasaun la loos, katak valór ki'ik liu iha selesaun maibé valór boot ne'e la liu.

"Ezame ne'e ema hotu hotu asesu, kandidatu sira, funsionáriu, no ema barak haree, no sistema ne'e transparente hela, no prosesu selesaun ne’e mós iha ema barak mak haree, asesór ho PNTL no akompaña mós husi ofisial supervizaun nian", dehan nia.

Ne’e duni, nia apela ba kandidatu sira ne'ebé la liu iha selesaun ne’e, lalika lori lia tun-sa'e katak selesaun ne’e sistema familiarizmu, maibé pasiénsia no hein selesaun ne'ebé tuir mai. (*)