Eis Komandante Xefe Falintil ne’e dehan, luta ba independensia Timor-Leste iha mós kontribuisaun maka’as husi diplomata José Ramos Horta iha rai li’ur.
"Iha 1999 ita la duni inimigu ho kilat musan, maibé duni ho pregu ne'ebé signifika lori ruin sira ne'ebé namkari, simbolu mak pregu ita tuu hodi inimigu ba, mais ita mesak labele, maibé hamutuk ho Timor nia talin (Frente Diplomatika) ne'ebé iha li’ur hodi ko'alia ho nasaun sira seluk," dehan Xanana iha nia diskursu hafoin vizita fatin ne'ebé kaptura saudozu Fransisco Xavier do Amaral iha suku Tutuluru, Kuarta (23/09).
Nune'e, lider Nasionál Xanana mós husu ba joven sira fahe malu, tan de'it tama iha grupu ne'ebé la hanesan.
"Joven sira hau husu imi labele fahe malu arbiru, ida tama grupu, ida seluk tama grupu ida hodi estraga malu, ne'e imi la respeita ona heroi sira ne'ebé sei moris, kuandu imi baku malu no oho malu imi kose foer ba sira nia isin lolon tomak," katak nia.
Tanba ne'e, atu sai sidadaun ne'ebé di’ak ba rai doben Timor nian, tenke unidade labele hare ba parte oioin.