Tempotimor (Dili)-Durante tempu barak nia laran, laiha kompañia estatál ne'ebé hola parte iha fornesimentu kombustivel ba sentru eletrika ne'ebé durante ne'e fornese eletrisidade ba povu no estadu.
Kada konkursu Publiku durante ne’e sempre ba manan ba kompañia privadu sira de'it mak nu’udar fornese kombustivel, nu’une’e duni governu liuhusi Ministru Petroleu no Minerais (MPM) Victor da Conceição Soares, Ministru Obras Públika (MOP) Salvadór Pires no Primeiru Ministru (PM) Taur Matan Ruak deside ona hodi Timor GAP mós hola parte iha fornesimentu kombustivel ba sentru eletrika.
"Timor GAP atu partisipa fornesimentu kombustivel ba EDTL, entaun ohin ami diskusaun kleur to'o hetan duni konkluzaun," dehan Ministru Victor iha Palásiu Governu, Sesta (25/9).
Governante ne'e afirma, proposta kona-ba partisipasaun Timor GAP nian ne'e mai dala barak iha Konsellu Ministru (KM), maibé ohin konsege fó opprtunidade hodi diskute.
"Kada fornesimentu ne'ebé Timor GAP fornese, sei fornese tokon 35 litru, ba rote EDTL tolu ne'ebé iha ne'e, sei fornese ba rote ida ne'ebé MOP sei deside," nia dehan.
Entretantu, atu formaliza asuntu refere, governu sei enkamiña dekretu lei ida ba Prezidente Repúblika (PR) hodi promulga, nune'e Timor GAP nia partisipasaun bele formal.