Tuir MAE Miguel Pereira de Carvalho, bazeia ba orsmentu ne'ebé munisípiu sira hetan, mak MAE hamutuk ho Prezidente Autoriedade Munisípiu sira nian, hodi halo justifikasaun ba proposta sura ne'ebé iha ona KROP.
"Tetu fiskal 2021 hamutuk tokon $36 ba munisípiu sira, entaun munisípiu sira mós submete ona proposta ba Komite Revizaun Orsamentu Politika (KROP), entaun ohin sira mai para justifika propoata sira ne'e," dehan Miguel Pereira de Carvalho iha edifísiu Ministériu Finansas (MF) Aitarak Laran, Dili, Sábadu (26/9).
Nia afirma, iha audiénsia ne'e mós, munisípiu 12 ne'e husi mós orsamentu adisionál purvolta tokon $32.
"Sira husu orsamentu adisionál pur-volta tokon $32, para bele garante katak, kada administrasaun munisipál sira, bele finansia atividade sira ne'ebé mak atribui ona ba sira ka nu'udar kompeténsia sira-nian," dehan Miguel.
Entretantu proposta husi munisípiu 12 ne'e, KROP konsidera, tanba ne'e sei diskute, oinsa atu haree orsamentu adisionál hira mak atu fó ba munisípiu sira, tanba alende husi ne'e, iha mós tetu fiskál ne'ebé ho totál tokon $36.
Governante ne'e subliña, programa prioridade ne'ebé munisípiu 12 iha mak hanesan, estudante sira bele hetan merenda eskolar, lideransa komunitáriu bele hetan direitu ba subsídiu ne'ebé konsagra tiha ona iha lei sira, funsionáriu públiku bele hetan direitu saláriu kada fulan.
Alende husi programa sira ne'e, MAE mós propoin atu reforsa rekursu administrasaun munisípiu sira liuhusi hadi'a fasilidade sira iha suku.
"Tau ekipamentu nesesáriu iha administrasaun suku sira nomós sede suku sira ne'ebé ladun di'ak ona presiza hadi'a," nia dehan.
MAE mós propoin orsamentu pur-volta tokon $10 iha Planu Dezenvolvimentu Integradu Munisípiu (PDIM), para finansia programa sira ne'ebé sei ezekuta husi munisípiu iha ámbitu PDIM.
"Durante ne'e PDIM nia osan tau iha governu sentrál, maibé agora ne'e la'e, tenke tau iha munisípiu sira para, sira mak jere, halo aprovizionamentu, monitoriza, fiskaliza nomós halo pagamentu rasik ba infraestrutura sira ne'e," nia dehan.
Ministru mós akresenta, MAE hamutuk ho munisípiu 12, propoin ba KROP pelumenus 55% husi orsamentu ba MAE, para finansia ba atividade sira ne'ebé kontribui direta ba rekoperasaun ekonómika ne'ebé governu aprova tiha ona iha fulan kotuk ba.
Entretantu tetu orsamentu 2021 nian ba MAE pur-volta tokon $32, ba munisípiu 12 iha tokon $36, maibé iha mós adisionál husi MAE no munisípiu 12 nian pur-volta tokon $37.(*)