Horta sei Hakerek Karta ba Amu Papa Hapara Karidade

Eis Prezidente da Republika (2007-2012) Dr. Jose Ramos Horta iha komunidade nia leet wainhira akompana Eis Prezidente da Republika (2002-2007) Kay Rala Xanana Gusmao halo asaun karidade ba populasaun sira iha suku Dotik, Alas, Manufahi (25/9) Eis Prezidente da Republika (2007-2012) Dr. Jose Ramos Horta iha komunidade nia leet wainhira akompana Eis Prezidente da Republika (2002-2007) Kay Rala Xanana Gusmao halo asaun karidade ba populasaun sira iha suku Dotik, Alas, Manufahi (25/9) Foto Tempo Timor

Tempotimor (Alas)-Laureadu Nobel da Pas José Ramos Horta deklara sei hakerek karta ida ba Amu Papa Francisco hodi fó orden ba igreja Katolika iha mundu tomak atu hapara sira-nia atividade karitativa.

Horta hato’o kestaun ne’e relasiona ho deklarasaun deputadu balun iha Parlamentu Nasionál ne’ebé kestiona asaun karitativa Xanana Gusmão no konsidera asaun refere hatun povu nia dignidade.

"Ha'u rona ema matenek-nain balun iha parlamentu nasionál dehan asaun karidade hatun dignidade povu, ha’u rona no hanoin kedan atu hakerek karta ba Amu Papa atu fó orden ba igreja hotu iha mundu para karidade, tanba karidade kontra fali ema-nia dignidade," dehan Horta ba konunidade sira iha suku Dotik, Postu Administrativu Alas, Munisípiu Manufahi, Sesta (25/09).

Aleinde hakerek karta ba Amu Papa, Horta dehan, nia mós hanoin atu hakerek karta ba Sekretariu Jeral Organizasaun Nasaun Unidas (ONU) António Guterres atu fó orden ba ajensia hotu iha mundu no Timor liu-liu PNUD, UNICEF, WFP hodi hapara fahe hahan.

"Ha'u sei hatete señora .....(Primeiru ministru nia Kaben) para ona karidade ne’ebé hala’o ona tinan barak, la di’ak ba povu nia dignidade," dehan nia.

Kona-ba deputadu ida ne’ebé mak koalia, eis Ministru Negosiu Estranjeiru ne’e dehan, nia la hatene see mak koalia tanba nia akompaña de'it iha media.

"Ha'u la hatene deputadu see mak ko'alia, maibé rona no haree iha media, ha'u kuaze fiar, tanba parlamentu mesak ema matenek de'it mak iha ne'ebá, entaun sira ko'alia ita tenke rona," dehan nia.

Tuir nia, iha situasaun pandemia covid-19, sorte Xanana kontinua hodi hala’o asaun karidade atu apoiu ferik-katuas no vulneravel sira.

 

Rate this item
(0 votes)
Last modified on Sunday, 27 September 2020 10:15
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.