Tempotimor (Dili) - Preokupasaun públiku nian kona-ba pasiente Covid-19 ne'ebé sempre mosu de'it iha tempu ne'ebé Estadu Emerjénsia atu hotu, maibé governu rejeita Covid-19 iha TL nu'udar kriasaun polítika.

Vise-Ministru Saúde (MS), Bonifácio Maucoli hateten, Covid-19 mosu iha TL la'ós governu mak politiza, maibé realidade iha duni kazu.

"Ema nia interpretasaun ne'e katak polítikamente, maibé realidade hanesan ne'e duni, ita hatene nasaun viziñu Indonézia de'it agora iha 349 kazu pozitivu, entaun ita hakarak husik de'it?" dehan nia, iha Parlamentu Nasionál (PN), Sesta (2/10).

Governante afirma, kazu ne'ebé Timor-Leste iha ne'e la'ós tranzmisaun lokál, maibé kazu importadu.

"Kazu sira ne'e mós afeta de'it ba joven sira ne'ebé sira-nia rezisténsia ne'e mos makaas, entaun durante ne'e ita izola no trata sira, ikus mai sira rekupera", katak nia.

Vise-MS ne'e mós afirma, kazu ne'e la'ós politiza tanba estadu emerjénsia atu hotu ona entaun halo ida ne'e, maibé la'ós, tanba ema ne'ebé servisu saúde ne'e tékniku, la'ós polítika.

Entretantu, sidadaun ne'ebé dadun ne'e pozitivu no iha sala izolamentu Vera Cruz ne'e nia kondisaun di'ak ona.

Alende ne'e, dadus ne'ebé www.tempotimor.com asesu iha pájina facebook Palásiu de Sinzas Ministériu Saúde nian, iha Tersa (1/10), ema ne'ebé halo ona teste hamutuk 8.073, rezultadu teste negativu hamutuk 7.702, sei hein rezultadu teste 343, iha sala izolamentu na'in ida, kazu konfirmadu na'in 28 no rekuperadu na'in 27. (*)