Haree ba surtu corona virus deasses 2019 (Covid-19) ne'ebé kontinua aumentu iha nasaun viziñu Indonézia, maka Estadu Timor-Leste, kontinua aplika estadu emerjénsia, hodi prevene moras da'et mai povu lokál.

Nune'e, bazeia ba komunikadu imprensa ne'ebé www.tempotimor.com asesu katak, Prezidente Repúblika (PR) Francisco Guterres Lú-Olo dekreta tan ona EE ba daneen, durante fulan Outubru tomak.

"Ohin, 3 outubru 2020, dekreta estadu emerjénsia daneen ba loron tolunulu, hahú husi tuku 00.00 iha segunda (5/10) sei termina iha tuku 23.59 iha tersa (3/11). Nune'e, durante loron 30, EE daneen sei vale ba teritóriu Timor tomak," dehan iha komunikadu imprensa ne'ebé asesu husi Palásiu Prezidensiál, Sábadu (3/10).

Deklarasaun EE sei parsialmente suspende no limite direitu ba sirkulasaun internasionál, liberdade sirkulasaun no fixasaun rezidénsia iha pontu hotu-hotu iha territóriu nasionál no direitu ba rezisténsia.

Alende ne'e molok PR Lú-Olo dereta EE daneen, Konsellu Ministru mós realiza reuniaun KM extraordináriu hodi aprova médida tretrusaun sira ne'ebé sei vale iha EE daneen, liu-liu ema ne'ebé tama ilegál.

"Ohin PN mós liuhusi lei númeru 9/2020, loron 3 Outubru fó autorizasaun ba renovasaun deklarasaun Estadu Emejénsia, no iha loraik ne'e kedas governu aprova médida ba implementasaun EE nian, ne'ebé tama envigor, bainhira EE foun hahú aban," dehan Ministru Prezidénsia Konsellu Ministru (MPKM) Fidelis Manuel.

Governante ne'e afirma, médida barak nafatin de'it, maibé iha médida foun balun mak importante par publiku atu hatene.

"Sidadaun nasionál nomós estranjeiru ne'ebé tama sai ilegál iha fronteira, se sidadaun nasionál ida tama mai ilegál iha fronteira mak PNTL kaer, sidadaun ne'e sei selu multa husi $30 to'o $250, depois tuir mai sidadaun ne'e mos sei selu nia kuarentina rasik," Nia relata.

Fidelis akresenta, "Ba sidadaun internasional ka estranjéru bainhira tama ilegal, ikus sei deporta fila, maibé antes deporta fila sidadaun ne'e, nia mós sei selu multa no selu ninia kuarentina rasik durante loron 14 ," tenik Nia

Maibé sidadaun internasionál ne'ebé tama iha TL liuhusi fonteira rai, tenke rejistu no aprova husi konsuladu, la'ós tama naran de'it.

Alende ne'e, estadu emerjénsia implementa ona ba daneen hahú kedas bainhira TL hetan kazu pozitivu ida iha 24 Marsu 2020.

"Desde fulan marsu, Covid-19 nu’udar moras importadu, TL implementa kedas EE bainhira rejista kazu pozitivu ida. Implementasaun EE nu’udar médida preventiva no kontrolu Covid-19 atu hases sidadaun hotu husi kalamidade públika," katak iha komunikadu.

Husi kedas fulan marsu 2020 to’o ohin loron, Timor-Leste rejista kazu pozitivu na’in-ida no na’in-27 rekuperadu.(*)