Nia hato'o kestaun ne'e, relasiona ho komentáriu balun ne'ebé deputadu bankada opozisaun CNRT halo, hodi akuza servisu Unidade Planeamentu Monitorizasaun Avaliasaun (UPMA).
Tuir nia, ezisténsia UPMA ne'e mosu, iha Sestu Governu, hanesan unidade ida ne'ebé servisu, hodi apoiu Primeiru Ministru.
"Deputadu sira kestiona kona-bá UPMA, ha'u hakarak fó hanoin katak, UPMA ne'e, mosu iha Sestu Governu, UPMA ne'e laiha diferensa, entre diresaun sira seluk, unidade ida ne'ebé ke fó apoiu ba Primeiru Ministru, i iha Primeiru Ministru nia okos, maibé ita deputadu sira iha ne'e, fó sala ba UPMA bele xoke, ita fó sala tomak ba UPMA, labele," dehan nia, iha debate espesialidade Proposta OJE 2020, iha Plenária PN, segunda (5/10).
Nia haktuir, hanesan konseitu balun ne'ebé iha naksalak, atu UPMA mak halo ka Asesór inklui DJ mak halo mos, bainhira tama ona, mai iha parlamentu, ne'e la'ós sira nia sala.
Nia hatutan, lei ne'ebé tama mai iha ne'e, signifika Governu ida ne'e nian, hanesan mos Parlamentu, komisaun sira halo Pareser, se kuandu tama ona iha plenária, ne'e komisaun nian, la'ós asesór nian,
"Ne'ebé ha'u nia hanoin, se kuandu ita fó sala, i sala Primeiru Ministru, se bu'at ruma la lo'os, kuandu konseitu ida be template ne'e laloos, ne'e, Primeiru Ministru mak sala ou governu maka sala," dehan nia.