KIP konsege halo investigasaun ba projetu ne’ebé governu implementa, maibé ikus mai serbisu ne’e konsidera ‘saugati’ tanba KIP la konsege aprezenta sira-nia relatoriu ba PN, tanba mosu ‘konfrontu’ entre membru KIP sira.
Maske nune’e, ikus mai, deputadu husi Bankada Partidu Demokratiku (PD) Adriano do Nascimento ne’ebé molok ne’e sai nu’udar Vise Prezidente KIP ‘sobu relatoriu’ KIP ne’ebé durante ne’e ‘subar metin’ hela.
Adriano dehan, iha momentu KIP tuun ba halo investigasaun ba projetu 143, sira identifika mós katak iha projetu 500, la inklui 143, ne’ebé laiha kontratu.
“Kuaze ami halo investigasaun liu komisaun inkeritu Parlamentar ne'e, ba projetu 143, maibé kuaze 500 hanesan ne'e projetu neebé laiha kontratu," dehan Deputadu Adriano iha diskusaun espesialidade ba proposta OJE 2020, iha PN, Kuarta (7/10).
Bazeia ba ida ne’e, Adriano husu ba Ministériu Obras Publika (MOP) atu halo verifikasaun didi’ak ba projetu sira ne'e.
“Projetu hirak ne'e momentu ne'ebá ajudikasun direta, laiha kontratu, i komisaun inkeritu halo ona ninia relatoriu, maibé la konsege halo apresiasaun tanba membru KIP balun ulun toos,” dehan nia.
Iha fatin hanesan, deputadu bankada PLP Francisco Vasconcelhos hatete, bainhira KIP la konsege halo relatoriu ba projetu hirak ne’ebé laiha kontratu, uniku dalan mak liu husi Ministériu Públiku.