Tuir relatoriu ne’e, maske governu ne’ebé lidera husi Primeiru Ministru Taur Matan Ruak halo ona esforsu signifikante, inklui re-estabelese apoiu finanseiru ba ONG sira ne’ebé atende vitima sira, maibé governu la hatudu esforsu signifikante liu tan kompara ho periodu anterior.
Relatoriu ne’e hatete, iha tinan 4 tutuir malu, governu TL la konsege hetan kondenasaun ba kualkér ofensa tráfiku. Vítima potensiál tráfiku na’in ida de’it, kompara ho vítima potensiál na’in 65 iha tinan 2018, identifika husi ONG ida – governu la konfirma kualkér kazu tráfiku no redús signifikativamente númeru investigasaun sira ba iha tráfiku.
“Servisu protesaun ba vítima kontinua la adekuadu no governu la finaliza ka aprova prosedimentu operasionál padraun ba identifikasaun vítima (SOP) – ne’ebé importante tebes tanba entendimentu ofisiál kona-ba tráfiku menus nafatin no autoridade sira kontinua halo detensaun no deportasaun ba vítimas potensiais tráfiku nian tanba violasaun imigrasaun sein halao prosedimentus triajen,” relatoriu ne’e hatete.
Entretantu, maske relatoriu ne’e hato’o kritika maka’as ba governu TL no hatuun TL nia grau, maibé tuir Ministra Negósiu Estranjéiru no Kooperasaun (MNEK) Maria Adaljiza Magno, relatoriu refere hanesan alarma de'it, tanba situasaun iha TL di'ak hela.
Ministra ne’e dehan, relatóriu husi EUA fó krítika maka'as ba governu TL kona-ba trafiku umanu, tanba governu la halo asaun ruma ho sériu hodi implementa lei relasiona ho trafiku umanu nian.
"Agora ita iha tiger two hela, di'ak hela, sira hanesan warning ita de'it par ita atu hadi'a, serbisu ho sira ita hadi'a, tanba ne'e sira-nia prosedura interna, sira halo ba rai hotu-hotu, la'ós ba ita de'it," dehan Adaljiza hafoin diskusaun espesialidade ba proposta OJE 2020 iha PN, Tersa (6/10).
"Ita sei haree, kolabora ho EUA par hadi'a, ita enkoraja nafatin sira katak, ida ne'e sira-nia relatóriu, mais situasaun iha TL di'ak hela, purtantu ita mós hadi'a situasaun tráfiku umanu ne'e."
Ministra ne’e hatete, TL iha lei hodi regula trafiku umanu, maibé kestaun mak iha implementasaun seidauk di'ak.
"Ita iha lei, agora oinsá atu implementa, vijilánsia mak maka'as de'it, kontrolu mak maka'as de'it husi implementasaun, ida ne'e mak importante," dehan nia.
