Tempotimor (Dili)-Komisaun Direitu Labaraik (KDL) iha planu atu haruka fila fali labarik husi Rejiaun Administrativu Espesial Oekusse-Ambeno (RAEOA) ne’ebé fa’an sasan iha Dili ba sira-nia moris fatin.

Komisaria KDL, Dinorah Granadeiro hatete, tuir dadus ne’ebé KDL rekolla, labaraik sira ne’ebé durante ne’e fa’an sasan iha Dili pursentu boot liu mai husi Oekusse.

"Dadus ne'ebé iha ami-nia fatin ne'e, ita halo asesmentu husi Janeiru to'o Abril 2020 nian, ita rejista kuaze labarik 300 ne'ebé halo hela serbisu infantíl nian," dehan Dinorah iha Ótel Novu Turizmu hafoin partisipa iha lansamentu ba programa Tatoli ba Cidália, Kinta (08/10).

Husi dadus ne’e, nia dehan, porsentu 90 eskola, maibé tenke halo negósiu tanba rendimentu familia laiha.

"Sira asesu ba edukasaun, maibé sira konfesa ba ami katak, sira tenke halo ida ne'e, tanba inan-aman nia kapasidade ekonómia labele apoiu duni sira, liu-liu oinsa atu sustenta familia nia moris, tanba ne'e mak sira halo atividade ne'e,” dehan nia.

Husi total labarik ne’ebé halo serbisu iha Dili, porsentu 40 mai husi RAEOA, tan ne’e iha ona diskusaun inisiu ho Prezidente Autoridade RAEOA oinsa atu haruka fila fali labarik sira ne’e ba Oekusse.

Nia dehan, Autoridade RAEOA presiza tau mós fundu ba labarik sira atu bainhira re-integra ba sira-nia familia, sira bele kontinua hetan apoiu.

"Husi PA RAEOA nian bele prevé fundu ruma ne'ebé mak bele apoiu ba labaraik sira, bainhira ita halo re-integrasaun ba familia iha Oekusse, tanba situasaun ne'ebé ita hetan katak sira laiha rendimentu duni," nia afirma.

Alende ne’e, nia hatutan, KDL mós serbisu hamutuk ho Ministériu Edukasaun, Juventude no Desportu, no Ministériu Solidariedade Sosiál no Inkluzaun (MSSI) atu labarik sira ne'ebé laiha rendimentu bele asesu ba edukasaun no hetan bolsa da mãe.

Entretantu, dadaun ne'e KDL servisu hamutuk ho Komisaun Kontra Servisu Infantíl (KKSI) SEFOPE hodi prepara draft lei ba labarik sira.

PUBLISIDADE