Tuir Vice-Primeiru Ministru no Ministru Planu Ordenamentu Teritorial (MPOT) José Maria dos Reis, governu sei buka dalan atu solusiona projetu sira ne'ebé laiha kontratu, tanba empreza balun hala'o ona servisu, nune'e labele husik sai vitima ba prosesu.
"Projetu hirak ne'ebé agora iha Ministériu Públiku ne'e oinsa ona ninia rezultadu? Ate agora sidauk, maibé ami tenta purke, ida ne'e uluk bankada Fretilín rasik mak haruka ba iha Ministériu Públiku sei halo hela analiza, ate agora sidauk iha rezultadu", Dehan José Reis iha palasiu governu, sesta (09/10).
Maibé, atu reafirma de'it, husi 140-ital projetu ne'e, 90-ital mak foti ona desizaun atu selu, tanba iha kontratu.
"44 ne'e laiha kontratu, maibé governu iha nafatin vontade par solusiona problema ida ne'e, tanba ita hotu hatene empreza balun halo tiha ona servisu, ita labele husik sai vitima ba prosesu, ida ne'e mak ami buka hela solusaun oinsa rezolve problema ne'e",Nia dehan
Iha projetu lubuk ida ne'ebé ami aloka ba fundu infraestrutura ho kapitál dezenvolvimentu tuir prioridade ne'ebé governu desidi.
"Iha enkontru ida ohin atu ajustamentu ba tetu Orsamentu 2021 nian ne'ebé antes ne'e Konsellu Ministru aprova ona, tanba ne'e mak ohin ami tenta atu ajusta, liu-liu iha fundus infraestrutura ho kapital dezenvolvimentu nian, ohin hamutuk ho Primeiru Ministru, Ministru Obras Publika atu ajusta projetu balun ne'ebé prioridade tebes atu hala'o iha tinan 2021",Nia afirma (*)
