Virgina hato'o komentariu ne'e relasiona ho deklarasaun Deputada Olinda ne’ebe duun eis Prezidente Komisaun D, komete mal admistrasaun iha tinan 2019.
"Senora ne'e dala-barak hatete ona, ne'e ferik ona, Maromak bolu ita kualker oras, ne'ebe kuidadu lia-fuan par labele estraga klamar, hakarak hatudu izemplu hatudu didi’ak ba," dehan Virgina liu husi nia intervensaun iha plenaria PN, Tersa (13/10).
Nia parte lamenta uitoan, tanba liu husi reuniaun lideres bankada iha semana kotuk, Olinda ne’ebé sai mós Vise Prezidente Komisaun D, kestiona kona-ba orasamentu husi rezerva kontizensia ne’ebé komisaun D uza iha 2019.
Nia konsidera deputada Olinda ladun hatene no la kompriende, tanba ezekusaun orsamentu husi rezerva kontizensia ne'e uluk Komisaun D utiliza hodi hala'o viajen ba Vietname.
"Ha’u atu husu de’it talves senora deputada ne'e la koñese se mak deputada Virgina, ha’u husu ba nia se bele karik ba check iha sekretariadu relasiona ho osan, ha’u bele fó hanoin istoria balun ba nia, kuandu iha 2012/2013 kuandu Parlamentu Nasional aprova nia orsamentu ba iha tratamentu de saude, Kuandu hasa'e ba $4 mil, deputada ida mesak vota absteinsaun ne'e mak ha’u, i ha’u kumpre orsamentu durante tinan 5 nia laran, ha’u nunka foti to'o $4 mill, tuir saida maka aprova antes, restu ha’u ba entrega fila fali ba iha banku, ha’u iha resivu hotu," dehan nia.
Hatan ba kestaun ne'e Deputada Olinda konsidera Virgina komete duni, tanba momentu ne'eba deputada CNRT ho ninia tekniku sira lakohi fó sai rezultadu ezekusaun fundu rezerva kontizensia ho montante rihun $10 ne'ebé molok ne'e sira foti.
Tuir nia, hafoin fila husi nasaun vietname, nia hanesan sekretaria komisaun D, nunka rona informasaun ruma husi gastu ne'ebe prezidente Komisaun halo, durante viajen estranjeiru, maibe derepente deit relatoriu ne'e mai dehan gastu ho osan boot ona.
"sim ha’u nudar deputada nomos membru komisaun D, membru sira hotu-hotu tenke hatene osan ne'e ba iha ne'ebe, hola saida, bele nia iha kuitansia, tenke tur hamutuk para bele hatudu ba malu, Katak osan restu mak ne'e,"dehan nia.