Ministru Administrasaun Estatal Miguel Pereira de Carvalho hatete, ema ne'ebé atu ba lidera munisipiu laos haree ba partidu, tanba sira ba nu’udar reprezenta governu sentral iha nivel munisípiu.
"Prezidente Autoridade Munisipál no Administradór Munisípiu la'os mai husi partidu, sira ne'e hanesan reprezentante governu sentral iha nivel munisípiu, bainhira ministériu loke konkursu públiku ne'e, ema hotu konkore tantu funsionariu públiku no ema husi liur atu partisipa iha prosesu ne'e",dehan Ministru Administrasaun Estatal (MAE) Miguel Pereira de Carvalho, hafoin reuniaun Konsellu Ministru extraordinária iha palasiu governu, Segunda (12/10).
Nia dehan, prosesu rekrutamentu ba Prezidente Autoridade Munisipál no Administradór Munisípiu iha Baucau Lautem no Vikeke, liu-husi rekrutamentu pur meritu ne'e, kandidatu selesionadu ou kualifikadu sira, sei hodi mai iha Konsellu Ministru atu halo deliberasaun, depois halo nomeasaun ba kandidatu sira, nune'e Munisípiu tolu refere dadaun foin mak iha faze provizoriu.
"Munisípiu Baucau, Lautem no Vikeke sidauk konklui, kuandu Konsellu Ministru foti ona desizaun, halo rezolusaun governu ida, atu nomeia sira ne'ebé iha lista laran atu sai Prezidente Autoridade ka Administradór Munisípiu no tempu hanesan mos ezonera sira ne'ebé dadaun eziste hela, maibé agora sira ne'ebé eziste ne'e, kontinua hala'o funsaun hanesan Prezidente Autoridade no Administradór Munisípiu," Nia esplika hafoin Konsellu Ministru extraordinária iha palasiu governu, Segunda (12/10).
Nia dehan, prosesu rekrutamentu ne'e konklui, kuandu Konsellu Ministru halo ona deliberasaun governu nian.
"Foin mak rezultadu pauta provizoriu husi ema nia ezame eskrita, ida ne'e mak foin sai, agora juri sira sei kontinua simu reklamasaun hodi trata ne'e hanesan foin faze ida, faze tuir mai sei lori ba konsulta iha konsultivu Munisipál, depois aprezenta mos iha traballu grupu komite lina ministerial, depois juri sira relata ba MAE par halo tuir saida mak temi iha Lei nia laran, entaun prosesu sei la'o, agora rezultadu sai ona ne'e bolu pauta provizoriu, sidauk final,” katak nia.