Proposta lei ba kriasaun OATL ne'e, atu sai hanesan, asosiasaun ne'ebé reprezenta advogadu no advogadu estajiáriu sira, ho personalidade jurídika no la sujeita ba poder sira orientasaun nian, hosi órgaun sira Estadu nian ka kualker pesoál koletiva públika ka privada, independente no autónoma, iha realizasaun ba nia objetivu sira.
"Ohin aprovadu ona no aprova Orden Advogadu nia estatutu, ho ida ne'e, ita fiar katak, setór justisa iha Timor-Leste, sei forsa liutan", dehan Fidelis Leite Magalhães, liu hosi konferénsia imprensa, hafoin remata reuniaun Konsellu Ministru, iha Palásiu Governu, kuarta (21/10).
Tanba, advogadu sira iha mekanizmu proópria, hodi garante nia estatutu autonomia, asegura funsionamentu no kontrola mekanizmu ba méritu rasik.
"Ema hirak ne'ebé tama iha OATL, iha duni méritu, atu sai advogadu no sira kualifikadu duni", Nia dehan
Poder sira ne’e, tutela legalidade kona-bá OATL, ne’ebé prevé iha rejime jurídiku asosiasaun públika profisionál sira, mak ezerse hosi Ministru Justisa.
Hosi atribuisaun oin-oin OATL nian, inklui responsabilidade hosi atribuisaun titúlu profisionál advogadu no advogadu estajiáriu nian, nune’e mós regulamenta ezersísiu ba nia profisaun.
OATL sei defende direitu no interese hosi nia membru sira, promove formasaun, atualizasaun no hasa'e profisionál no kontribui ba interkámbiu, kolaborasaun no kooperasaun ho instituisaun ne'ebé hanesan. (*)