António Armindo ne’ebe akompana husi eis komandante PNTL ne'ebe agora hakna'ar nu'udar asesor, Paulo Martins, ba Komisariu PNTL Faustinho da Costro ho ninia Vise Mateus Fernandez, nia akresenta, aplikasaun disiplina ne'e, foka liu ba lor-loron bainhira ajente hetan Komandante Sesaun, Politaun to'o Komisáriu, importante tenke kumprimenta no halo kontinénsia.
"Ita ko'alia kona-bá disiplina, ita ko'alia kona-bá oinsá mak Komisáriu nain rua ajuda, halo Default Message ba membru hotu-hotu, kona-bá disiplina," dehan António Armindo, iha Kuartel Jerál PNTL Caicoli, Díli, kuarta (21/10).
Governante ne'e hatutan, regras disiplina ne'ebé PNTL iha, aplika mos ba Korpu Seguransa Pesoál (CSP: sigla Portugés) sira ne'ebé, halo eskoltu ba VIP sira, bainhira hasoru Komisáriu, Komandante Sesaun to'o Politaun inklui membru governu presiza kumprimenta no kontinénsia. Nune’e apela ba CSP sira labele sente a’an hanesan mos VIP.
"Sira (CSP) kuandu ba eskoltu VIP sira, la signifika katak, sira-nia nível hanesan ho VIP, kuandu sira hetan komandante, membru governu sira, komandante sesaun ba to'o Komisáriu, sira tenke kontinénsia," dehan António.
Iha biban hanesan vice ministru husu atu komisariu nain rua Hamutuk ho vice Ministru hodi trasa planu ba treinumentu referesaun/refreshment training ba membru sira inklui membru CSP sira neebe mak agora eskoltu VIP sira liu liu sira neebe mak eskoltu lider historiku sira konaba standar profesional hanesan membru PNTL laos membru sai fali hanesan tia VIP ka membru politiku.
António hatutan objetivu hasoru Komisáriu PNTL, atu fó hanoin ba Komandante hotu-hotu, Komandante unidade, atu hato'o mensajem disiplina ba to'o membru hotu-hotu no messagem ne'e bolu, Default Message, atu nune'e lor-loron iha formatura.
"Komandante sira tenke fó hanoin nafatin katak, orientasaun hosi Komisáriu mak ko'alia kona-bá disiplina, étika servisu, ko'alia kona-bá oinsá mak ita hakruk ba ita-nia ierarkia," hakotu António.
Alende ne'e, atu ordem ka regulamentu disiplinar PNTL nian nee la'o ho efetivamente no rigór, Komandante Polísia Munisipais, Unidades, Diretór Departamentu no Eskuadra sira iha dever hodi fiskaliza ativamente implementasaun, prátika no asaun. Bainhira membru sira la kumpri ordem ne'ebé estabelese ona, mak Komandante Polísia sira sei foti medidas, hodi aplika sansaun disiplinar, tuir kompeténsia Komandu ida-idak nian.(*)
