Deputadu hato'o komentariu ne'e relasiona ho planu Ministeriu Justisa (MJ) ne'ebe atu sosa tan kilat ba Polisia Sientífika no Investigasaun Kriminal (PSIK).
Tuir nia, timor-leste hanesan rai ki'ik ida, tenke limite armas mai iha rai laran, para depois governu hela ho responsabilidade kontrolu ba PNTL ho F-FDTL kona-bá utiliza armas tuir konstituisaun.
Tanba nia dehan, iha konstituisun RDTL ne'e so garante de'it membru PNTL no F-FDTL mak bele utiliza kilat, maibe la autoriza dehan instituisun sira seluk atu utiliza mos kilat.
"uluk kedas hau dehan hanesan ne'e, ita kuidadu ho armas sira ne'e ho didiak, ita atu kontrola didiak, aumesmu ita nia konstituisaun mos koalia so polisia no F-FDTL maka kaer kilat,"dehan nia iha Parlamentu Nasional (PN), kinta (22/10).
Ba buat hirak ne'e, Nia sujere primeiru ministru ho nia membru Governu presiza tetu kona-ba SIk ho PSIK ne'e, tanba SIK ne'e iha PNTL nia okos ne'ebe hanaran servisu Investigasun Kriminal, no polisia sientifika investigasaun kriminal, hanesan instituisaun ida, ne'ebe seidauk iha lei ida para atu autoriza kaer kilat. Maibe nia prefere diak liu governu mobiliza membru polisia ba iha PSIK nune'e bele garante sira atu kaer kilat tuir konstituisaun.
Mesmu deklara ona pozisun katak la konkorda maibe deputadu mandati deklara nia prontu kopera no Entrega desizaun hirak ne'e ba governu, se karik kestaun ida ne'e hatete klaru ona iha dekretu governu ninia ka lei ruma.