"Ohin ha’u bolu media mai iha MSSI atu klarifika informasaun kona-ba prosesu pagamentu ba reklamasaun, ne'ebé tama iha MSSI, provizoriumente husu ba públiku no benefisiáriu sira ne'ebé naran taka sai ona iha suku atu pasensia ituan, tanba iha segunda dia 26 Outubru MSSI sidauk bele realiza prosesu pagamentu", Diretor Jerál MSSI Rui Exposto hato’o asuntu ne’e iha edifísiu MSSI Kaikoli, Sábadu (24/10).
Nia husu atu pasiénsia oituan, tanba, bainhira Ministériu Solidariedade Sosiál no Inkluzaun (MSSI) ho Ministériu Finansas (MF) konklui prosesu, sei anunsia fila-fali kona-ba prosesu pagamentu ne’e.
"Ha’u hodi Vise-Primeira Ministra no Ministra Solidariedade Sosiál no Inkluzaun, nia naran husu deskulpa ba benefisiáriu sira, tanba hein kleur ona ba iha prosesu pagamentu ", MS husu deskulpa.
Maski nune’e, governu garante nafatin benefisiáriu ne'ebé naran taka ona iha suku, iha direitu atu simu kleur ka lalais sei simu duni subsidiu ne’e.
"Ami husu ita boot sira nia pasiensia no kompreensaun hodi fo tempu ba ami ekipa tekniku atu halo preparasaun diak liu ba prosesu pagamentu ne’e", Nia hateten tan.
Kona-ba bainhira mak halo pagamentu, Nia dehan, sidauk bele determina data fiksu, maibé garante, ho esforsu tomak bele aselera prosesu ne'e.
Entretantu, total reklamante ne'ebé tama hahu kedan iha Fulan Juñu, depois halo pagamentu subsidiu ba uma kain agregadu familia purvolta 15,754 reklamantes.
Husi rihun 15 ne'e, iha 13,044 (trez mil e kuarenta I kuatru) mak MSSI sei entrega ba Ministériu Admistrasaun Estatal, atu halo klarifikasaun ba sira nia reklamasaun no MSSI desidi avansa uluk ho 2,909 mak naran taka sai ona iha suku.