Tuir portavóz Komandu Jerál (PNTL) Suprientendente Xefe Arnaldo Araoju katak, mate isin Domingas da Conceicao hakotu iss iha loron sabdu (24/10/2020), no entrega ona ba familia sira.

"Iha dia 25, Ro-ahi ne'ebé mak husi Oekusse mai Dili, Ro Sukses, komunidade ida mate iha Ro laran, no oras ne'e, dadaun vitima mate iha ona familia nia liman", Portavóz PNTL relata iha Komandu Jerál PNTL kaikoli, Segunda (26/10).

Kauza husi mate isin ne'e, parte PNTL sidauk hatene, tanba familia ba mate isin, sira lakohi halo autopsia.

"Kauza husi mate ne'e, ita sidauk hatene ida ne'e, tanba familia sira lakohi halo autopsia, no sira hakarak hodi ba hakoi de'it, entaun PNTL mos konkorda ida ne'e, entrega ba familia hodi ba hakoi de'it", dehan Nia

Mate isin Domingas da Conceicao Marques ne'e, husi aldeia Turleu, Suku Tibar, Postu Bazartete, Munisípiu Likisa no tuir informasaun ne'ebé tempotimor asesu katak, vitima ne'e ba partisia lia iha Oekusse hafoin fila mai hakotu iss iha Ro Ahi sukses laran.