Ministra Negósiu Estranjeiru no Kooperasaun (MNEK), Adaljiza Albertina Xavier Reis Magno esplika, timoroan sira iha rai liur, barak mak ezije atu fila mai Timor, tanba ne’e governu sei esforsu atu rezolve asuntu tékniku liuliu ba orsamentu nian.
"Israel nian ida ne'e mos problema orsamentu hotu. Tanba ema sira ne'e ba bolsa ka lae, ami tenki buka meiu ida atu justifika oinsa ita iha osan para selu ema sira ne'e. Ita nia problema tékniku, tanba ne’e ita labele foti osan naran selu tun sa'e, prosesu tenki iha, se lae ita lori tiha mai problema fali ami mak susar ona," Adaljiza hateten ba jornalista sira iha Palásiu guvernu Dili, Kuarta (28/10).
Nia hatete, governu esforsu hela tanba iha tan komunikasaun foun balun ho ministériu finansas parese iha tempu badak iha ona rezultadu pozitivu.
Antes ne'e, Ministru Agrikultura no Peska, Pedro dos Reis hateten, relasiona ho Timor Oan 72 ne'ebé daudaun ne'e iha Israel, nia parte relata ona ba Primeiru ministru inklui serbisu hamutuk ho MNEK, tanba ne'e sei hein prosesu admistrativu balun.
