Hafoin retiru, Sekretariu Jerál partidu Frente Revolusionariu Timor-Leste Independente (FRETILÍN), Mari Alkatiri hateten, bankada opozisaun ne'ebé partisipa retiru oitavu governu nian ba dalima iha kampuz Universidade Nasionál Timor Lorosa'e (UNTL), politeknika hera, atu apoia OJE 2021 iha Parlamentu Nasionál.
"Bankada sira la'ós membru plataforma, tanba sira partisipa iha ne'e, iha últimu Orsamentu sira mos vota afavor ", dehan Alkatiri hafoin retiru Sesta (30/10).
Nia afirma, pozisaun plataforma entendimentu partidu Fretilín, PLP, no KHUNTO, nia mak koordenador, tanba ne'e iha retiru atu prepara ba Orsamentu Jerál Estadu (OJE) tinan 2021 nian.
"Hau hanesan koordenador plataforma entendimentu, prontu plataforma ne'e, Fretilín, PLP, KHUNTO, maibé ha’u mak kordena", nia hateten.
Nia esplika, retiru ne’e laiha desizaun ruma, maibé oinsa atu halo diskusaun ida kle'an hodi prepara ba diskusaun OJE tiann 2021 iha Parlamentu Nasionál.
"Ohin laiha desizaun, diskusaun sobre halo nusa mak prepara an atu deskuti OJE 2021", nia akresenta.