Projetu ligasaun dijitál liuhosi kabu submariñu fibra ótika nian ne'e sei liga husi sidade Darwin no Port Hedland, iha Commonwealth Australia mai Timor-Leste.

"Konsellu Ministru ohin aprova projetu deliberasaun ida ne'e, ne'ebé iha oin mai saida mak sei akontese, maka husi parte MOP nian ho ministériu relevante sira hahú ona servisu atu asegura ligasaun kabu submariñu fibra ótika husi Darwin mai Timor-leste", Ministru Prezidénsia Konsellu Ministru (MPKM), Fidelis Leite Magalhăes hateten ba jornalísta sira hafoin reuniaun Konsellu Ministru (KM), iha Palásiu Governu, kuarta (04/11).

Iha biban ne'e, governu halo aprovasaun mós ba prosedimentu husi aprovizionamentu ba kontratu aluga infra-estrutura deskarga konbustivel ba depózitu sentrál eletrika Hera nian husi periudu tinan tolu.

Prosedimentu aprovizionamentu kona-ba kontratu ne'e, aprezenta husi Ministru Obras Publikas (MOP) ho hanoin katak, estadu laiha infraestrutura no nesesita aluga empreza privada sira ba ninia utilizasaun ida ne'ebé iha deskarga kombustivel esensiál ba produsaun enerjia sentrál eletrika sira.