“Ha’u seidauk haree progresu Governu nian kona-ba setór produtivu hanesan agrikultura, tanba buat ne’ebé ministu relevante halo ne’e, buat ne’ebé uluk ema halo ona ne’e, mak nia kolleta deit, mas programa foun iha setór agrikultura ne’e seidauk iha”, dehan Deputadu Bankada FRETILIN, Antoninho Bianco, iha Parlamentu Nasionál, Tersa (23/4).
Tuir depudatu opozisaun ne’e, programa foun ne’e seidauk la’o tanba osan deit seidauk ezekuta, depois osan sira ne’e sei selu ba tusan sira ne’ebé uluk nian.
Parte infraestrutura sira ne’ebé iha ne’e, la’os projetu foun, maibé kontinuasaun programa, tanba deve ne’ebé uluk halo mak hodi konstroi estrada sira diresaun Dili-Manatutu-Natarbora no seluk tan.
Entretantu, portavós Governu, Sekrétariu Estadu Komunikasaun Sosiál (SEKOMS), Merício Juvinal dos Reis Akara dehan, setór produtivu nian iha progresu ona tanba Ministru Agrikultura tuun ba baze hodi haree ba irrigasaun hodi hadia no halo kolleta ba rezultadu produtu agrikultór sira nia iha Baukau no seluk tan.
“Ita nia Ministru Agrikultura tuun ba cheek irrigasaun sira, nafatin prodúz no iha parte Baukau komesa kolleta kuandu ministru agrikultura tuun ba baze”, tenik nia.
Akara hatutan, rezultadu sira ne’ebé iha ne’e hanesan indikasaun ida, maibé ida ne’ebé alvu ba VIII Governu mak sosa ona asaun Greater Sunrise no agora Timor-Leste sai ona na'in.