Deklarasaun ne’e bazeia ba keixa ne'ebé Marí Alkatiri aprezenta ba Ministériu Públiku (MP) kontra bankada CNRT, ohin.
Duarte afirma, bankada CNRT prontu atu hatán, tanba ema hotu iha lei nia okos.
"Bainhira ema ida lori ema seluk ba tribunál ne'e ninia direitu, tanba sente ofendidu ka prezudikadu ba deklarasaun ruma. Entaun, ami hanesan autór ba deklarasaun ne'ebé prezudika doutór Marí Alkatiri no se-se, ami prontu ba hatán, tanba tenke submete ba lei no lei mak ordena ita tenke kumpri," Duarte hateten ba jornalista iha Parlamentu Nasionál (PN), Sesta (6/11).
Deputadu ne'e mós afirma, keixa Mari Alkatri nian ne'e bankada seidauk hatene konteudu kona-ba saida, maibé hanesan sidadaun pontu atu hatán.
"Ami hein de'it, se iha pedidu ruma husi MP mak ami ba hatán. Ami hanesan deputadu iha imunidade, maibé maneira saida de'it tenke liuhusi prosesu, mai iha ne'e, depois aprezenta ba komisaun no komisaun dehan ba hatán, ami ba hatán," nia esplika.
Nia mós subliña katak, hanesan deputadu sempre prontu, tanba horsida lei mak sei haree, tanba deputadu ne'e iha ne'ebé de'it bele ko'alia.