Governante ne'e hateten, importante mak transparánsia no responsablidade husi kompañia ne'ebé governu fó fiar atu distribui sesta bázika ba komunidade tuir lei ne'ebé iha.
"Bele mós menus oituan, maibé menus bele transparente no responsabliza. Ita husu hotu-hotu nia kooperasaun atu komprende tanba kuandu orsamentu aloka ho montante populasaun 1.3, dadus ikus ne'ebé ita hetan husi MAE, númeru ne'e besik ona millaun 1.5," Joaquim hateten.
Nia espika tan, kompañia ne'ebé governu fó fiar hodi distribui ai-han ba sesta bázika tenki tuir Lei, katak sidadaun ida iha direitu hetan besik $25.
"La’e, nia montante tuir lei ne'ebé iha ate $25, ita hein katak kompañia sira ne'ebé distribui kumpri volume no montante ne'ebé merese direitu sidadaun idaidak nian," Joaquim dehan ba jornalista iha PN, Segunda (9/11).
Entertantu Governu rasik deside implementa pakote rekoperasaun ekonomika hanesan sesta bázika ho montante orsamentu total millaun $112 ne'ebé mak sei sosa produtu husi agrikutór no distribui ba povu durante fulan novembru to'o dezembru.