Prezidente Parlamentu Nasionál (PPN) Aniceto Longuinhos Guterres hateten, maski kalendáriu aprova ona, maibé depende ba audiénsia públika ne'ebé komisaun sira hala'o hela.

"Tuir rejimentu prazu loron 20 ba komisaun espsializada, liu-liu komisaun C ne'ebé trata asuntu Finansas Públikas ne'ebé hahú sura husi loron 30 Outobru. Entaun, kalendáriu globál ida ne'e, agora la'o daudauk audénsia públika ne'ebé hahú tiha ona iha 6 Novembru," Aniceto hateten ba jornalista sira iha Palásiu Prezidensiál Bairru-pite, Dili, Segunda (9/11).

Tuir Aniceto, audénsia públika sei remata iha 17 Novembru no iha 23 Novembru komisaun hotu-hotu tenke submete ona relatóriu ka pareser setoriál ba Komisaun C.

"Bainhira komisaun sira submete ona relatóriu setoriál ba komisaun C, sei iha tempu semana ida, atu elabora relatóriu pareser ba Komisaun C nian atu aprejenta mai iha plenáriu Parlamentu Nasionál," Aniceto subliña.

Lider másimu órgaun lejisladór ne'e mós dehan, plenária Parlamentu Nasionál bele debate jeneralidade atu hahú iha 1 Dezembru, konforme kalendáriu ne'ebé iha tiha ona, maibé 18 fulan ne’e, ba aprosima semana audiénsia públika hotu tiha, sei iha konferénsia lider bankada sira, atu define kalendáriu sira ne'ebé tuir prosesu orsamentu nian.