Husi totál millaun $141 ne'e, sei preve millaun $127 ba saláriu no Vensimentu, Bens no Servisu, Tranferénsia Públika, Kapital Menór, Kapitál dezenvolvimentu, no miliaun $14 sei previstu ba rezolve konstrusaun Ró Haksolok.
Ho montante orsamentu ne'ebé boot, maka Prezidente bankada KHUNTO Olinda Guteres husu atu prezidente autoridade RAEOA Arsénio Bano tenke gasta ho loloos no labele “na’ok” osan refere.
"Ba povu RAEOA ita boot sira bele gasta to'o lubuk mós importante labele iha na’ok. Tanba ita na’ok ne'e signifika korrupsaun," Olinda husu ne’e liu husi audiénsia públika OJE 2021 iha plenária PN, Tersa (10/11).
Kona-ba alokasan osan ba RAEOA deputada ne'e hateten, KHUNTO fó nafatin apoiu, tanba ida ne'e diak ba povu nia moris.
Hatan ba kestaun ne'e Arsénio Bano hateten, totál miliaun $127 ne'e sei foku ba setór sosiál, COVID-19 hanesan ameasa ba dezenvolvimentu hodi asegora povu Oekusse hamutuk rihun 85 ne’e seguru, inklui harii kuarentena iha fronteira Sakato, Oesilo, Pasabe no Citrana.
Prioridade seluk mós kona-ba problema bee-moos, progresu projetu sira-ne’ebé la’o ona no nesesidade bázika sira.
"iha 2021, ita nia prioridade primeiru mak COVID-19 hanesan ameasa ba dezenvolvimentu hodi asegura povu Oé-Cusse rihun 85, depois Tuir mak bee moos, infra estrutura, setor sosial, ita sei rezolve," Arsénio hateten.
