Prezidente Administrasaun Konsellu Kombatentes Libertasaun Nasionál (KKLN) Vidal de Jesus "Riak Leman” hateten, Primeiru Ministru Taur Matan Ruak fó ona resposta, karik iha tempu sei ba halo abertura ba asembleia jerál ne’e.
"Primeiru Ministru dehan, iha tempu sei ba halo abertura ba asembleia no ita nia maun boot Prezidente Repúblika mós sei lisensa hela, maibé ami nia karta hato'o ona ba. Sira na'in rua, ida bele loke no ida taka”, Riak Leman hateten lia hirak ne’e, hafoin hasoru-malu ho Primeiru Ministru Taur Matan Ruak iha palasiu governu, Tersa (10/11).
Nia dehan, asembleia jerál ne'e sei realiza hahú iha loron 18 to'o 20 fulan novembru tinan 2020 atu aprova planu estratéjiku Konsellu Kombatentes Libertasaun Nasionál nian.
"Ne'ebé ekipa téknika lidera husi irmaun Kriadu, prepara hotu ona", nia dehan.
Riak Leman esplika katak, planu estratéjiku ne'e, bolu konsellu munisipál liu-liu sira ne'ebé iha estrutura laran atu mai halo apresiasaun ba planu ida ne'e.
"Planu ne'e loron 3 kedas, hotu tiha ami bolu mós konsellu fiskál, disiplinár no konsellu konsultivu balun ba iha ne’ebá, ami haree hamutuk loron rua, eh loron ida ikus mak ba iha kuartál jenerál, tanba veteranu barak mak iha neebá”, nia esplika tan.
Alende ne’e, iha asembleia jerál ne'e atu aprova mós bandeira no logo Konsellu Kombatentes Libertasaun Nasionál nian ho tan rezimentu asembleia jerál nian.
