Ministru Transporte no Komunikasaun (MTK), José Agustinho da Silva esklarese, loke konkursu, tanba operadór ne'ebé, antes ne'e fornese internet ba governu kontratu remata ona iha loron 31 fulan outubru tinan 2020.
"Ohin audiénsia ho Primeiru Ministru atu relata progresu servisu balun ne'ebé durante Ministériu Transporte no Komunikasaun hala'o. Primeiru pontu oinsa ita asegura rede telkomunikasaun liu-liu periudu ezekusaun orsamentu, ita nia rede tenke aseguradu", José hateten ba jornalista hafoin hasoru-malu ho Primeiru Ministru Taur Matan Ruak iha palasiu governu, Tersa (10/11).
Tuir nia, iha rede internet free valance tenke funsiona normál ho speed rede ne'ebé mak kualidade.
"Anteriormente ita nia rede internet ne'e asegura husi kompañia website média, eh kontratu expire ona iha foin lalais dia 31 outubru", nia hateten.
Nune'e, Ministériu Transporte Komunikasaun tenke iha alternativa oinsa atu rede ne'e aseguradu, entaun realiza konkursu ida ne'ebé operadores telekomunikasaun sira partisipa, no ikus mai nia rezultadu kompañia telkomcel mak sai vensedór.
"Rede internet agora aseguradu husi kompañia telkomcel, hodi fasilita ita nia funsionamentu ezekusaun orsamentu durante tinan 2020 nia rohan", nia hakotu