Tanba ne’e, Lere dehan, bainhira laiha masakre Santa Kruz, maka mundu la hatene Timor nia hakarak ba ukun rasik aan.

“Iha 1991, iha trazédia boot ida akontese iha Timor-Leste no trazédia ida ne’e nia rezultadu mak Timor ukun-aan. Joven sira ne’ebé see sira-nia hirus matan ba Indonézia ninia kilat musan, kilat kanu, fakar sira-nia ran, so’e sira-nia isin iha Santa Kruz ne’ebá, atu mundu bele rekoñese katak, Timor hakarak ukun-aan duni,” Lere hateten lia hirak ne’e hafoin enkontru semanál ho Prezidente Repúblika Francisco Guterres Lú Olo, iha Palásiu Prezidensiál Bairru-Pite, Kuarta (11/11).

Nia mós dehan, antes ne’e ema balun dúvida kona-ba Timor ne’e funu ka lae, Timor ne’e hakarak ukun aan ka lae, tanba FALINTIL de’it mak halai tuun sa’e iha ai-laran.

“Sira ne’ebé sobrevive, ami agradese ba familia sira ne’ebé ohin loron ninia oan la hamutuk ona sira, tanba sira fakar ran ba rai ida ne’e,” Lere agradese.

Jenerál ne’e mós husu ba joven sira atu hare ba tinan 28 kotuk ne’ebé joven sira luta ba Timor-Leste nia destinu, nune’e sai referénsia atu hare ba futuru dezenvolvimentu Timor-Leste nian.

“12 Novembru, joven sira, ba maluk sira ne’ebé mate, maluk sira ne’ebé sei moris ne’e, sai referénsia ida atu ita bele lori ita-nia nasaun ne’e ba oin,” nia subliña.

Lider fitun rua ne’e afirma, nasaun Timor-Leste atu ba oin, tenke iha estabilidade, tanba iha estabilidade mak dezenvolvimentu bele lao ba oin.

Publisidade