Lú Olo husu ne’e hafoin partisia serimonia komemorasaun masakre Santa Kruz 12 Novembru ba dala 29 iha semitériu Santa Krus Dili, ohin.
"Hu apela ba parte hotu-hotu atu servisu hamutuk, kria espasu ba joven sira atu esplora sira-nia potensial, fó-sai sira-nia talentu no kapasidade iha área oioin atu dezenvolve ita-nia rain,"Lú Olo husu.
Xefe estadu ne’e hatutan, iha tinan rua nulu resin sia liubá, foin-sa’e sira see sira-nia hírus matan ba kilat no ajuda loke mundu nia matan ba Timoroan sira-nia halerik no luta ba ukun Rasik An.
Ne'e duni agora nu’udár aman ba nasaun, Prezidente Repúblika fiar katak foin-sa’e sira bele sai Forsa boot ida ne’ebé bele hamosu kriatividade oioin atu solusiona problemas no preokupasaun sira ne’ebé ne'ebé povu hasoru iha nasaun ne'e.
“Ha’u fiar duni katak, Juventude bele ajuda Estadu hetan solusaun ba problema hotu-hotu iha ohin loron. Juventude bele ajuda Governu implementa Planu Rekoperasaun Ekonómika," Xefe estadu fiar.
Atu remata, Xefe estadu hakarak hato'o lia menon ba ema hotu katak, Juventude Lorico Asua’in nia isin no raan mak bele sai kbiit no forsa ba imi joven sira agora, “Timor-Leste independente presiza timoroan hotu-hotu nia servisu, esforsu, dedikasaun no vontade atu serví”.
Aleinde ne’e, Joven sira tenke estuda, aprende hamutuk no valoriza pasadu nia eroízmu no hanoin polítiku ba futuru, ho inisiativa no kreatividade mak sai sasukat loloos ba ezersísiu sidadania no ema servisu na’in tenke Prezerva no defende valores luta nian no prinsípius Estadu nian, Demokrasia no mós Direitu ne’ebé halo povu no nasaun Independente. (*)
PUBLISIDADE