Abrão Saldanha "Nokosiku" hateten lia hirak ne’e iha diskursu serimónia posse ba membru Konsellu Nasionál Dezenvolvimentu Juventude (KNDJ) iha edifísiu Ministériu Finansas, Aitarak Laran, Segunda (16/11).

"Agora daudaun ita hatene problema boot joven nian mak empregu, formasaun abilidade joven sira nian, oinsá mak konsellu sira reúne buka estratéjia intervensaun iha liña ministériu hotu. La'ós SEJD mak sei toma konta, joven iha agrikultura, joven iha komérsiu, joven iha turízmu, joven iha siénsia teknolojia iha área oi-oin ita bele buka planu integradu ida," nia akresenta.

Abrão Saldanha rgumenta, mandatu prinsipál ne'ebé KNDJ sei halo uluk mak, harii planu asaun nasionál integradu ba joven sira.

"Depois kuandu planu ne'e iha ona mak konsellu ne'e sei koordena nia implementasaun, monitoriza hamutuk ho organizasoens juventude sira atu tau matan ba joven sira," nia esplika.

Kona-ba estudu ne'ebé KNDJ atu halo, sei rekomenda ba governu, atu integra iha planeamentu integrada ba assuntus dezenvolvimentu juventude nian.

"Ohin tomada de pose ba konselu nasionál dezenvolvimentu juventude ne'e orgaun koordenasaun interministeriál ne'ebé atu servisu ba joven sira", nia hateten tan.

Konsellu Nasionál dezenvolvimentu juventude nia papél mak atu promove planu asaun Integradu ida ba joven, eh akompaña implementasaun no estudu kona-ba joven sira nia situasaun ne'ebé iha.

"Ida ne'e mak mandatu husi politika nasionál juventude, uluk iha VI governu kedas halo ida ne'e, agora presiza dinamiza atu bele lori asuntus transversal iha liña ministeriál no entidade hotu oinsa atu fó solusaun ba problema joven nian", nia tenik.

Nia dekalara katak, posse ba membru Konsellu nasionál dezenvolvimentu juventude, no hahu husi ne'e ba oin prepara servisu sira ne'ebé buka dalan ba problema joven nian.

Entretantu, mandatu ba membru KNDJ na'in 17 ne'ebé hetan pose, durante tinan 4, no membru KNDJ ne'e mai husi liña ministériu hotu.(*)

PUBLISIDADE