Diretór ezekutivu Centru Nasionál CHEGA, Hugo Maria Fernandes hateten, iha relatóriu Comissăo Verdade e Reconcíliaçăo (CAVR) ne'ebé hanaran Chega, no relatóriu konjuntu entre Timor-Leste ho Indonézia "Per Memoriam Ad Spem" ka Husi memória ba esperasa ne'ebé hato'o nia rekomemdasaun importante ida maka iha relasaun ho servisu seitór defeza ho seguransa nian.
“Tanba ne'e liuhusi nota intendimentu ne'ebé halo, atu foku ba oinsá maka estadu ho governu implementa dadauk rekomendasaun balun ligadu ho istória ba auto determinasaun TL nian”, Hugo Fernandes hateten lia hirak ne’e hafoin asina MoU ho Vise Ministru Interiór, António Armindo iha Balide, Kinta (19/11).
Tuir nia, Centru Nasionál Chega ho ministériu interior presiza servisu hamutuk liu tan hodi introdúz istória pasadu ba membru polísia sira atu hatene kona-ba violasaun sira pasadu hodi labele akontese tan iha TL.
"Fó hanoin ba sira katak, sosiedade ida ne'ebé loro-loron sira serví ne'e, sira mai husi sosiedade post konflitu ida, sosiedade ida ne'ebé kontinua trauma hela aktu sira pasadu nian. Entaun, bele fó hanoin sira para sira nia dezempeñamentu ne'e, banati tuir padraun internasional, tuir ita nia konstituisaun lei no padraun operasionál sira", Hugo hateten.
Nia hatutan, intervensaun ida importante maka liuhusi formasaun, kontinua diálogu entre entidade seguransa sira ho komunidade, esplika ba sira saida mak kna'ar husi instituisaun seguransa nian, saida maka komunidade nia resposta ne'ebé di'ak, atu labele mosu dezentendimentu bebeik.
“Tanba dala-ruma laiha komunikasaun, entaun ema hanoin katak, ita nia forsa seguransa sira halo aktu ruma ne'ebé agresivu”, nia subliña.
Iha fatin hanesan Vise Ministru Interior, António Armindo konsidera relatóriu husi CHEGA importante atu hasa'e koñesimentu membru polísia sira nian hodi fó seguransa ne'ebé di'ak ba komunidade.
Tanba ne'e, ho nota intendimentu ne'ebé sira hala'o, parte MI bele servisu hamutuk ho CHEGA hodi introdúz istória pasadu ligadu ho aktus violasaun sira mak akontese iha istória pasadu hodi labele tan mosu iha tempu ohin loron.
"Atu lori instituisaun ida seguransa ne'e atu halo treinamentu, desiminasaun ba sira atu oinsá mak bele koñese di'ak liu tan saida mak direitus umanus", nia dehan.
Nota entendimentu ne’e, sei hala’o durante tinan haat atu bele servisu hamutuk liutan iha formasaun ba membru sira kona-ba istória pasadu no tinan 2021 CHEGA hahú ona prodúz módulu hodi introdúz ba membru polísia sira. (*)
