Iha komferénsia imprensa ne'e, prezidente PN Aniceto Guteres konta tuir, iha momentu ne'ebé hahalok ne'ebé Sekretária-Jerál hatudu primeiru nia halo abuzu ba nia funsaun sira ká halo intervensaun ba kompeténsia Gabinete Seguransa ni'an ne'ebé tutela direta ba Prezidente Parlamentu Nasionál.
Daruak, Sekretária-Jerál la dezenpeña nia funsaun koordenasaun servisu regulár ho Prezidente Parlamentu Nasionál ne'ebé mós nu'udar Prezidente ba Konsellu Administrasaun.
Datoluk, Sekretária-Jerál Parlamentu Nasionál liu-husi nia despaixu iha loron, 15 Maiu 2020, fo instrusaun ba funsionáriu Parlamentu Nasionál, hodi boikota funsionamentu nomál plenária, liu- liu orienta hodi halo paralizasaun ba sistema sonoro no apoiu seluk ba plenária iha loron, 18 no 19 Maiu 2020.
Daha' at, Sekretária-Jerál Parlamentu Nasionál, la-obedese ba orientasaun superiór, demonstra la iha responsablidade durante enerjia elétrika avaria, inklui mákina fotokopiadora, ar kondisionadu no abastesimentu ba bee iha Parlamentu Nasionál.
Liga ho atetude hirak ne'e maka, ohin tersa , 24 Novembru 2020 prezidente PN halo despaixu ho númeru 30/2020/PPN, kona-ba halo destituisaun ba Sekretária-Jerál Parlamentu Nasionál.
Entretantu Prezidente Parlamentu Nasionál halo destituisaun ne'e bazeia ba nú. 3 artigu 23, Lei nú. 12/2017, 24 Maiu, ne'ebé hateten katak Sekretáriu-Jerál bele destituidu tanba justa kauza.
De faktu iha duni justa kauza mak justifika Prezidente foti desizaun ida ne'e, iha ámbitu violasaun ba Lei Organizasaun no Funsionamentu Administrasaun Parlamentár, viola Rejimentu Parlamentu Nasionál artigu 85.
Hafoin halo destituisaun ba Cedelizia Faria dos Santos, Aniceto Guterres, halo kedas despaixu nú.31/2020/V/PPN hodi nomeia Adelino Afonso de Jesus, Tékniku Superiór Parlamentár Asistente, eskalaun 3 husi kuadru permanente funsionáriu Sekretariadu Jerál PN no iha tempu badak sei hala’o serimónia hand over.(*)