Alkatiri La Fiar Totál “Xanana Gusmão”

Eis Primeiru Ministru Marí Alkatiri la'er liman ho Eis Prezidente da Republika Kay Rala Xanana Gusmao iha kampana ba kandidatu Prezidente da Republika Dr, Francisco Guterres Lu Olo iha 2017 Eis Primeiru Ministru Marí Alkatiri la'er liman ho Eis Prezidente da Republika Kay Rala Xanana Gusmao iha kampana ba kandidatu Prezidente da Republika Dr, Francisco Guterres Lu Olo iha 2017 Foto Suplai

Tempotimor (Dili)- Eis Primeiru Ministru Marí Alkatiri anunsia ba públiku katak, lidér sira atu hamutuk ne’e só mehi iha tempu meudia alias “mimpi di siang bolong”.

Alkatiri ko’alia asuntu ne’e relasiona ho preokupasaun públiku kona-ba diferénsa ideia husi lider nasionál sira no mós sira nia fila kotuk ba malu to’o ohin loron nunka hamutuk.

“Atu hamutuk fali ne’e ha’u hanoin mimpi di siang bolong. Ne'e ha'u ko'alia momós de'it, tanba ha'u la gosta ema sona ha'u husi kotuk. Ha'u la sona ema ida husi kotuk, ha'u ko'alia frontál ka ba loos mai loos, mais ne'e ko'alia. Atu ódiu ka vigansa iha moris tomak ne'e laiha," Alkatiri hateten iha salaun IOB Fomentu, Tersa (24/11).

Alkatiri mós afirma liután katak, kuandu deklara la fiar ona ne'e, la fiar totál, tanba la gosta ema sona nia husi kotuk.

"Lidér balun agora ha'u la fiar, sira bele iha influénsia, povu kontinua gosta sira, maibé ha'u la fiar ne'e la fiar ona. Sira bele halai hamutuk para ida sai pregu no ida bele sai martelu, mais ha'u la fiar ne'e ha'u la fiar duni," Marí espressa ninia sentimentu.

Nia mós sujere katak, lider nasionál sira atu hamutuk ne’e presija iha hanoin hamutuk ba asuntu esensiál sira.

"Atu hamutuk tenke hanoin hanesan, tenta ona, maibé komu hanoin la hanesan, mak ita agora la hamutuk ne’e. Se mak lakohi hamutuk, ita hotu hamutuk, maibé presija hanoin hanesan, pelumenus ida esensiál,” Alkatiri dehan tan.

Marí Alkatiri mós akresenta liután katak, karau vaka ho karau timur ba han duut ne'e han hamutuk, maibé kalan fila ba uma ne'e ida-idak iha nia luhan.

"Imi hare ona luhan ida tau karau vaka ho karau timur ka lae, entaun mak ida ne'e duni, biar nune'e duni, maibé rai ne'e nia futuru brillante tebes”, nia fiar.

Iha fatin hanesan Prezidente Konsellu Imprensa (KI) Virgílio da Silva Guterres hateten, lider sira atu hamutuk fali ne'e fiar mihis loos ona.

"Ha'u-nia esperansa ba maun boot sira atu hamutuk ne'e mihis ba bei-beik ona. Ami-nia respeitu nafatin ba sira, mais esperansa ba sira atu tuur hamutuk ne'e mihis ona. Maibé, aban ka bainrua akontese, entaun milagre boot ne'ebé sira halo ba povu Timor mak ne'e. Depois iha loron ida ha'u mós dehan ba doutór Ramos Horta katak, se imi laiha kapasidade rezolve povu nia problema, entaun imi rezolve tiha imi-nia problema para ami bele rezolve de'it ami-nia problema no povu nian," Virgílio hateten.

Prezidente KI ne'e mós fó ezemplu katak, uluk daun ida monu iha Ramelau tutun hotu-hotu hatene, maibé agora nusa labele komunika ba malu, presija mós konxiénte katak diferénsia ne'e mós razaun ida ne'ebé atu halo mudansa, maibé sasan hotu iha nia tempu.(*)

Rate this item
(1 Vote)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.

Contact us

Palapasu
Dili, Timor-Leste
+670 7723 4852
+670 7728 1698
https://www.tempotimor.com

Kalendariu Arkivu

« January 2021 »
Mon Tue Wed Thu Fri Sat Sun
        1 2 3
4 5 6 7 8 9 10
11 12 13 14 15 16 17
18 19 20 21 22 23 24
25 26 27 28 29 30 31

Tempo Timor Networks