Marí Alkatiri fó sai realidade ne’e iha salaun Institute of Business (IOB) Fomentu, bainhira sai oradór ba semináriu nasionál kona-ba Proklamasaun Independensia Timor-Leste ba dala 45, iha 28 Novembru 1975.
“Horseik sira balun dehan ba ha’u katak, Marí agora mak ó iha tempu barak ba o-nia bei-oan sira, maibé ha’u dehan agora mak ha’u laiha tempu duni, tanba ha’u simu dokumentu boot para fó opiniaun ba ministériu sira, ha’u mak tenke lee, ha’u mak tenke kurije, sira husu ha’u tenke fó,” Alkatiri hateten liuhusi nia intervensaun ba estudante sira iha salaun IOB Fomentu, Tersa (24/11).
Alkatiri subliña, durante ne’e nia laiha asesor, maibé servisu hamutuk de’it ho xefe gabinete ida no funsionáriu ida.
Nia mós dehan, apoiu ne’ebé Sekretáriu Jerál Fretilin ne’e halo ba governu la husu duit metan ida, depois ema sira ne’ebé servisu hamutuk ho Alkatiri nia rasik mak selu hotu inklui seguransa uma nian.
Alende ne'e Alkatiri kontinua apoiu governu liuhusi fó opiniaun hodi hadi'a povu nia moris.
“Ha’u loron-loron apoiu governu, ha’u hakarak governu ne’e iha susesu hodi bele hadi'a povu nia moris, ha’u fó opiniaun lori ministru sira ba baze atu esplika ba povu, lori nafatin esperansa katak, orsamentu jerál estadu 2021 to'o 2023 sei pasa,” Alkatiri hakotu.(*)
