Husi dadus ne’e, totál 600 resin mak sei lakon direitu pagamentu subsídiu Covid-19 tanba rekomenda husi xefi suku sira.

Ministru Miguel Pereira de Carvalho hateten, MSSI haruka lista reklamante hamutuk 13. 044 ba MAE, husi dadus ne’e parte MAE konklui ona, no daudaun ne'e iha 2.884 mak halo ona pagamentu.

"Lista komfirmadu hotu ona no husi lista 13.044 ne'e 600 resin mak xefi suku-aldeia dehan katak labele selu tanba la rejistu iha sira nia suku laran, kuandu la rejistu iha sira nia suku laran, xefi suku-aldeia sira konfirma dehan laiha, ita labele selu," Miguel dehan iha Palásiu guvernu Dili, Kuarta (25/11).

Miguel salienta, husi 13.044, MAE no MSSI konkorda hamutuk rihun 12 resin haruka ba Ministeiru Finansas (MF) atu transfere osan ba suku sira hodi halo pagamentu.

Governante ne'e esplika prosesu verifikasaun ba lista reklamante sira mak MAE verifika dadus reklamante haruka fali ba suku sira, depois suku sira kontinua verifika iha livru suku, no haruka fali informasaun ba MAE, nune'e MAE haruka ba MSSI no MF mak sei transfere osan ba konta bankaria suku hodi halo pagamentu.

Miguel hatutan, durante verifikasaun dadus reklamante, MAE lahetan irregularidade maibe iha konfirmasaun balun husi xefi suku-aldeia sira husi 13.044 reklamante 600 resin mak la rejistu iha livru suku antes loron determinadu (8/5).

Entertantu daudaun ne'e, pagamentu ba reklamante hamutuk 2.884 no restante hamutuk rihun 12 resin mak tuir planu sei finaliza iha fulan oin.(*)